Reykjavíkurborg valdi að loknu útboði ReSource International, Transition Labs og M/Studio til að gera fýsileikakönnun um hringrásargarð á Álfsnesi. Fyrirtækin munu leggja til leiðir til að þróa lengra iðnaðarvistkerfið sem þróast hefur á síðustu árum á Álfsnesi. Settar verða upp aðgerðaáætlanir og skipulagstillögur sem munu gera hringrásarferla framkvæmanlega á stórum skala. Leiðarljós hringrásargarðsins er að finna úrgangi fyrirtækja og heimila farveg sem hráefni í aðra starfsemi. Þannig er lágmarkað bæði urðun á höfuðborgarsvæðinu og mengun sem sprettur úr línulegu hagkerfi.
Verkefnið skiptist í þrjá hluta:
- Greining auðlindastrauma og mögulegs iðnaðarvistkerfis.
- Samfélagsleg áhrif og ábati fyrir höfuðborgarsvæðið.
- Umsjón, fjármögnun og markaðssetning.
Yfirumsjón verkefnisins, verkefnastjórnun og fyrsti verkhluti eru í höndum ReSource International. M/Studio sjá um annan verkhluta og Transition Labs sjá um þann þriðja.
Öflugri hringrásargarður yrði mikilvæg stoð í því hringrásarhagkerfi sem gert er ráð fyrir í Græna planinu, heildarstefnu Reykjavíkurborgar til 2030 um samdrátt í losun gróðurhúsalofttegunda. Á heimasíðu Græna plansins má sjá frekari lýsingu á verkefninu.
Um þessar mundir auglýsa Reykjavíkurborg og teymið sem vinnur verkefnið eftir fyrirtækjum og öðrum aðilum, sem hafa áhuga á að vera með starfsemi í hringrásargarðinum á Álfsnesi. Nánar: Hringrásargarður á Álfsnesi
